NATAL! ANÔTE SÁNTO!

N'acunga anôte frio di rachá - têm dôs mil áno passado - gente virá ôlo tentá Céu azinha já olá unga porçám di estréla abri-fichá, corê-pará. Na meo di tánto estréla-estréla qui ramendá diamánte na anôte iscuro, têm unga quelê grándi, inchido di luz istonteánte.

Cidádi co campal, mato co montánha, casita cubrido co pália, casarám erguido co pedra, tudo virá ficá lumiado pa acunga estréla di luz fórti-fórti.

Gente ficá alvoroçado, corê-vai, corê-vêm, querê sabe qui-cuza ta sucedê. Di Céu dôs ánjo vêm básso, sai voz suave falá.

    Glória pa Dios na Céu! 
    Jesus Pequinino já nacê! 
    
    Sã divera. 
    
    Jesus Pequinino, 
    Justo já nacê, 
    Di frio tremido, 
    Na chám di Belém. 
    
    Filo divino
    Di Virgem Maria
    Já nacê. 
    Vêm-cá nós vai azinha
    Adorá nôsso Rê. 
    
    Di amor qui inchido, 
    Quiança adorado
    Vêm Mundo trazê pa nôs
    Paz co salvaçám. 

Olá, sá Natal! Anôte sánto di luz abençoado. Acunga estréla grándi qui fazê espánto já sai pa lumiã lugar sagrado qui Dios, nôsso Pai di Céu, onçôm escolhê pa Su Filo nacê, vêm Mundo fêto home.

Jesus nacê humilde, co amor na Su coraçám. Ele vêm trazê pa tudo criatura bénça di Su Pai, co promessa di paz co salvaçám.

Quánto-cento ánjo suprá trompéta, chapá voz cantá pa humanidádi intéro uví:

Glória pa Dios ali-riva na Céu,

Paz na tera pa gente co bô-vontádi!

    Glória pa Dios! 
    Natal! Natal! 
    Luz di paz ta deramá... 
    Natal! Natal! 
    Amornádi faltá! 

Sino grándi, sino pequinino nom-têm fim di tocá. Ding-dóng-déng, ding-dóng-déng! Nom-têm uvido qui nádi uvi. Anjo fazê nuvidádi, falá sá voz di Céu ta cantá. Co alegria, co devoçám, gente ispaliado na Tera chapá voz pa cantá, pa alegrá su coraçám.

    Festa di Natal
    Sã pa nôs sentí
    Tánto alegria, 
    Pa pôde vivo co paz. 
    
    Rico, pobre, tudo sá igual, 
    Pôs tudo têm pa uvi
    Voz di Céu cantá glória. 

Jesus Pequinin, Filo di Dios, nacê humilde na chám di Belém, na riva di unga chonto di pália duro. Virgem Maria olá Su Filo tiritá di frio, vagar-vagar virá mám pegá Su cháli cubri corpo sagrado di Jesus Pequinino.

Inchido di ternura, Maria, nom-pôde más di amorosa, sai voz dóci qui dóci falá: Filo di iou-sa coraçám, iou têm aqui pa olá pa Vôs. Durmí, durmi co sosségo, Filo divino di Dios!

Tudo cai na siléncio pa dessá nôsso Rê durmí.

    Anôte filiz, 
    Anôte di amor, 
    Grándi luz já sandê. 
    Sã Maria-Sua Filo qui vêm, 
    Fila Sánto di Céu já nacê, 
    Co unga mundo di amor, 
    Co unga mundo di paz. 
    
    Filo di Dios, 
    Nôsso Jesus, 
    Nôsso quirubim ta durmí. 
    
    Lua, vôs mánso-mánso andá, 
    Estréla-estréla vagar corê; 
    Nôsso Rê ta durmí
    Co divinal paz di Céu. 

Jesus Pequinino, Filo di Dios, nôssos Rê di Céu, perdoá nôsso astreviménto, dessá nôs, na estunga Natal, vêm pedi co Vôs. Co tudo humidádi, co coraçám burifado di amor, alma limpo di pecado, nôs querê pedí co Vôs: Lembrá chomá Vôsso Mai, Maria Santíssima, pegá Su cháli sánto insençado co puréza, pa vêm cubrí nôsso Macau.

Jesus Pequinino, olá: nôsso ôlo têm lágrimargo di tristéza; nôsso coraçám nom pôde-más di disconsolado...

Macau abençoado querê Su proteçám, querê senti calor di Su Amor di Mai...

    Jesus Pequinino, 
    Uví nôso oraçám! 
    Maria, Mai di Dios, 
    Uvi nôsso coraçám! 

Publicado in Revista de Cultura,

N° 3, I Série, Outubro/Dezembro de 1987.

* Escritor, poeta, estudioso e divulgador do "patuá" dialecto macaense (+1993).