SINAL Dl KRUZ (Sinal da Cruz)
Kum Nomi di Pai, Filu, Spritu Santu, Amen.
PAI NUSSA NUSSA PAI (Pai Nosso)
Pai nussa ki teng na seu
Santafikadu bossa Nomi
Bossa reinu beng
Bossa bontadi kumpri
Na terra assi kuma na seu
Dar nussa pang di kada dia
Perdua nussa pekadu
Assi nus perdua nussa inimigu
Nang dessa nus teng mal intentasang
Mas libra kum nus di tudu mal
Amen.
AVE MARIA (Ave Maria)
Ave Maria cheu di grasa
Sinyur teng kum bos
Bensuadu bos di tudu muler
Bensuadu akeli fruta di bossa ventri, Jesus
Santa Maria Mai di Deus
Rogar per nus pekador agora
Assi na oras di nussa morti Amen.
GLORIA (Glória ao Pai)
Gloria kum Pai, Filu, assi kum Spiritu Santu
Assi di nasensa, agora, até per sempri
Mundu seng fing
Amen.
YEO KOMSA (Confissão)
Yeo komsar kum Deus Grandi
Assi kum bos minya irmang-kanyung
Ki yeo ja fáze pekadu kum unsong sa falia
Kum yeo sa sintidu
Kum yeo sa palabra
Kum ki yeo ja faze
Assi ki yeo nunka faze
Yeo pidi kum Bensuadu Maria sempri Virgim
Assi kum bos minya irmang-kanyung
Para reza per yeo kum Nussa Sinyur Deus
Dessa Deus Grandi teng piadadi kum bos
Perdua nussa pekadu, assi dar kum nus bida eternu
Amen.
YEO KONFIA (Profissão de Fé-Credo)
Nus konfia kum Deus
Pai ki tudu Grandi
Eli ja faze seu kum mundu
Tudu ki podi ola, assi ki num podi ola
Nus konfia kum ungwa Sinyur Jesus Kristu
Filu unsong di Deus (Filu solteru di Deus)
Filu eternu di sua Pai
Deus di Deus, Lus di Lus
Berdadi Deus di Berdadi Deus
Ja alkansa, nunka faze, igual Bida kum sua Pai
Tudu ankoza ki ja faze teng passadu di Eli
Para nus pobu assi nussa salvasang
Eli ja dise di seu
Nase di Virgim Maria, ja fika omi
Per nussa kauzu eli ja toka krusifika
Na mang di Pontius Pilato
Eli ja sufri, murre assi ja toka 'ntarra
Na treseru dia Eli ja bibe di torna
Assi ki ja premete na "Skritur"
Eli ja subi na seu
Ta santa na mang dretu di seu Pai
Eli logu beng kum gloria para passa sentensa/julga'
Kum jenti di tend bida assi keng ki ja murre (assi kum defuntu)
Eli sa reinu seng fing
Nus konfia kum Spritu Santu, nussa Sinyur ki bensua bida,
Juntadu kum sua pai kum Filu
Juntadu kum Pai kum Filu nus adora
Eli ja papia passadu di Eli sa Profeta
Nus konfia kum ungwa greza Katolika
Nus kunise ungwa baptismu para perdua pekadu
Nus ta spera ora di ki nus logu bibe di torna
Para bibe/fika na outru mundu Amen.
KANTIGA INTRADA (Cântico de entrada)
Padri: Kum Nomi di Pai, Filu, Spritu Santu.
Pobu: Amen.
KUMPRAMINTU(Saudação) Fórmula A
Padri: Grasa di Sinyur Jesus Kristu, kum amurozu di Deus juntadu kum Spritu Santu teng kum bos tudu.
Pobu: Assi kum bos.
REZU Dl PINITENSIA
(Rito penitencial)
Padri: Minya irmang-kanyung beng nus prepara nussa pesua per selebra isti sagradu sigredu, beng nus lembra nussa pekadu
Fórmula A
Tudu: Yeo komsa kum Deus Grandi
Assi kum bos minya irmang-kanyung
Ki yeo ja faze pekadu kum unsong sa falia
Kum yeo sa sintidu
Kum yeo sa palabra
Kum ki yeo ja faze
Assi ki yeo nunka faze
Yeo pidi kum Bensuadu Maria sempri Virgim
Assi kum tudu anju kum santu
Assi kum bos minya irmang-kanyung
Para reza per yeo kum Nussa Sinyur Deus
Padri: Dessa Deus Grandi, tend piadadi kum nus Perdua nussa pekadu, assi dar kum nus Bida eternu.
Pobu: Amen.
SINYUR TENG PIADADI (Senhor, tende piedade de nós)
Padri: Sinyur teng piadadi!
Pobu: Sinyur teng piadadi!
Padri: Kristu teng piadadi!
Pobu: Kristu teng piadadi!
Padri: Sinyur teng piadadi!
Pobu: Sinyur teng piadadi!
GLORIA KUM DEUS (Glória)
Tudu: Gloria kum Deus na tudu altu
Paz kum eli sa jenti na mundu
Sinyur Deus, Rei di seu
Grandi Deus Pai
Nus adora kum Bos
Nus dar merse kum Bos Nus gabar kum Bos assi bossa gloria
Sinyur Jesus Kristu, Filu unsong (solteru) di sua Pai
Sinyur Filu di Deus
Bos limpa pekadu di mundu
Dar piadadi kum nus
Bos ki ta santa na mang dretu di Pai
Resebe nussa rezu
Bos unsong ki santafikadu
Bos unsong ki Sinyur
Bos unsong ki Grandi Umbes
Jesus Kristu
Kum Spritu Santu
Na gloria di Deus Pai
Amen.
PREMIRU REZU (Oremus)
Padri: Beng nus reza.
Pobu: Amen.
LES PREMIRU (Primeira leitura)
Pobu: Isti teng Palabra di nussa Sinyur Merse kum Deus.
LES SIGUNDA (Segunda leitura)
Pobu: Isti teng Palabra di Nussa Sinyur Merse kum Deus.
EVANGELO (Evangelho)
Padri: Nussa Sinyur teng kum bos.
Pobu: Mesmu kum bos.
Padri: Ungwa lisang di Evangelo di...
Pobu: Gloria kum bos Sinyur.
Padri: Isti teng Evangelo di nussa Sinyur.
Pobu: Rogar kum Bos Sinyur Jesus Kristu.
REZU Dl KONFIANSA (Profissão de Fé-Credo)
Nus Konfia kum Deus
Pai ki tudu Grandi
Eli ja faze seu kum mundu
Tudu ki podi ola, assi ki num podi ola
Nus konfia kum ungwa Sinyur Jesus Kristu
Filu unsong di Deus (Filu solteru di Deus)
Filu eternu di sua Pai
Deus di Deus, Lus di Lus
Berdadi Deus di Berdadi Deus
Ja alkansa, nunka faze, igual Bida kum sua Pai
Tudu ankoza ki ja faze teng passadu di Eli
Para nus pobu assi nussa salvasang
Eli ja dise di seu
Nase di Virgim Maria, ja fika omi
Per nussa kauzu Eli ja toka krusifika
Na mang di Pontius Pilato
Eli ja sufri, murre assi ja toka 'ntarra
Na treseru dia Eli ja bibe di torna
Assi ki ja premete na 'Skritura
Ta santa na mang dretu di sua Pai
Eli logu beng kum gloria para passa sentensa/julga'
Kum jenti ki teng bida assi keng ki ja murre
Eli sa reinu seng fing
Nus konfia kum Spritu Santu, nussa Sinyur ki bensua Bida,
Juntadu kum sua Pai kum Filu.
Juntadu kum Pai kum Filu nus adora
Eli ja papia passadu di Eli sa Profeta
Nus konfia kum ungwa Greza Katolika
Nus kunise ungwa baptismu para perdua pekadu
Nus ta spera oras di ki nus logu bibe di torna
Para bibe/fika na outru mundu Amen.
KANTIGA DI OFERSE
(Cântico do Ofertório)
Padri: Bensuadu bos Sinyur Deus di tudu kretura
Kum bossa bondadi nus oferse isti pang
Ki chang ja dar, jenti sa mang ja faze
Isti logu fika nussa pang di Bida.
Pobu: Deus Bensuadu per sempri.
Padri: Bensuadu Sinyur, Deus di tudu kretura
Kum bossa bondadi nus teng isti binyu per oferse
Fruta di albi, trabaliadu di jenti sa mang
Isti logu fika nussa beberaza di spritu.
Pobu: Deus Bensuadu per sempri.
Padri: Sinyur Deus nus pidi bos resebe kum nus
Fika gradisidu kum isti sakrifisu
Ki nus ta oferse kum korsang infadu bassadu.
Sinyur laba yeo sa mal
Limpa yeo sa pekadu.
ABIZU PARA REZA (Orai, Irmãos)
Padri: Reza irmang-kanyung dessa deus nussa Pai
Resebe nussa sakrifisu.
Pobu: Dessa Sinyur Deus resebe isti sakrifisu
di bossa mang per gloria di Eli sa nomi
per nussa prebetu assi sa prebetu
di tudu Eli sa Greza.
REZU RIBA DI OFERTA (Oração para depois do Ofertório)
Padri: Sinyur Deus teng kum bos.
Pobu: Assi kum bos.
Padri: Lanta bossa korsang.
Pobu: Nus oferse kum Sinyur Deus.
Padri: Beng uns dar merse kum Sinyur Deus.
Pobu: Teng berdadi ki nus gabar assi dar merse kum Eli.
SANTUS, SANTUS, SANTUS (Santo, Santo Santo)
Padri: Santus, Santus, Santus Sinyur Deus
Ki tudu forsa, seu kum mundu inchidu kum bossa gloria
Hosanna na tudu altu.
Bensuadu Eli ki ja beng kum nomi di Deus
Hosanna na tudu altu.
KANTIGA DI MEMORIA (Aclamação)
Padri: Beng nus publika segreda dl rilijiang.
Pobu: Kristu ja murre
Kristu ja bibe di torna
Kristu logu beng torna.
(Doxologia da oração eucarística)
Padri: Passadu di Eli
Kum Eli
Na Eli
Kum uniang di Spritu Santu
Tudu gloria kum honra teng bossa
Grandi Pai
Sempri per sempri.
Pobu: Amen.
REZU DI NUSSA SINYUR (Pai Nosso)
Padri: Beng nus reza kum konfiansa kum Deus Pai
Isti rezu di Jesus Kristu ja prende
Pai nussa ki teng na seu
Santafikadu bossa Nomi
Bossa reinu beng
Bossa bontadi kumpri
Na terra assi na seu
Dar nussa pang di kada dia
Perdua nussa pekadu
Assi nus perdua nussa inimigu
Nang dessa nus teng mal intentasang
Mas libra kum nus di tudu mal Amen.
Padri: Libra kum nus Sinyur di tudu mal
Dar kum nus paz
Kum bossa piadadi garda kum nus di pekadu
Aguenta kum nus di tudu ansiadadi
Assi nus spera kum speransa alegri
Para Jesus Kristu.
Pobu: Per bossa reinu bossa forsa
Kum bossa gloria agora ate per sempri.
Padri: Sinyur Jesus Kristu bos ja falar kum bossa Apostolu
Yeo sa paz yeo larga kum bos, yeo sa paz yeo dar kum bos
Nang diber nussa pekadu, mas na konfiansa di bossa Greza
Bensua kum nus bossa paz, kum uniang di bossa reinu
Undi bos fika interu sempri.
Pobu: Amen.
SINAL DI PAZ (Sinal da Paz)
Padri: Paz di Deus fika kum bos per sempri.
Pobu: Mesmu kum bos.
Padri: Beng nus oferse ungwa kum otru sinal di paz.
KEBRASANG DI PANG (Fracção do Pão)
Padri: Dessa isti mistura di korpu kum sangi di Jesus Kristu
trize bida eternu kum nus ki ta resebe.
Pobu: Sinyur Deus bos ki limpa pekadu di mundu dar kum nus paz.
Padri: Sinyur Jesus Kristu, Filu di Deus
Kum bontadi di Deus Pai juntadu kum Spritu Santu
Bossa morti ja libra mundu
Di bossa sagradu korpu kum sangi
Libra kum yeo di pekadu assi tudu mal
Dessa yeo fika fiel kum bossa prendisu
Nang dessa yeo fika dispachadu di bos.
(Ou)
Sinyur Jesus Kristu
Kum konfiansa di bossa amurozu kum piadadi
Yeo kumi bossa korpu, bebe bossa sangi
Nang dessa isti trize kondenasang kum yeo
Mas dar saudi di sintidu kum nus,
Padri: Isti teng Filu di Deus
Keng ki toma tudu pekadu di mundu
Alegria um olotru ki ja acha abizu kumi.
Pobu: Sinyur Deus yeo seng balor ta resebe kum bos
Mas kum bossa palabra yeo logu acha kura.
Padri: Dessa isti korpu di Kristu dar kum yeo bida eternu
Dessa isti korpu di Kristu dar kum yeo bida eternu.
KANTIGA DI KUMUNGA (Cântico da Comunhão)
Padri: Korpu di Kristu.
Pobu: Amen.
REZU KABA KUMUNGA (Oração depois da Comunhão)
Padri: Beng nus reza.
Pobu: Amen.
BENSA (Benção Final)
Padri: Sinyur Deus fika kum bos.
Pobu: Assi kum bos.
Padri: Dessa Deus benzei kum bos
Kum nomi di Pai, Filu, Spritu Santu.
Pobu: Amen.
FING DI MISSA (Rito Final) - A
Padri: Bai kum paz di Kristu.
Pobu: Merse kum Deus.
MISSAL DOMINICAL-ANO B
Nus beng kum bos Sinyur Pai
per gabar assi dar merse,
passadu di Jesus Kristu bossa Filu.
Passadu di Eli, nus pidi bos resebe assi benzei
isto oferta ki nus ta oferse kum bos na isti sakrifisu.
NUS REZA PER GREZA (Oração pela Igreja)
Nus oferse isti sakrifisu per bossa santa Greza Katolika,
bizia kum governa bossa Greza
dar paz kum uniang per interu mundu.
Nus oferse isti sakrifisu perJuang
Paulu, nussa santu Papa
per James nussa Bispu,
assi per tudu ki ta katakiza rilijiang Katolika,
ki nus ja resebe di bossa Apostolu.
PER KENG TA BIBE (Comemoração dos Vivos)
Sinyur, lembra bossa jenti
prinsipal N kum N per keng nus agora ta reza.
Lembra kum nus ki agora teng na bossa presensa.
Bos sabe kai firmi nus konfia kum bos
Nus konsagra kum bos nussa pessua
Nus oferse isti sakrifisu di merse,
Nus assi per tudu keng nus ama-stima.
Nus reza kum bos, Deus ki bida assi berdadi
per nussa saudi kum salvasang.
PER HONRA KUM SANTU (Na Comunhão de toda a Igreja)
Na uniang kum interu Greza, nus honra kum Maria, sempri Virgim,
Mai di Jesus Kristu nussa Sinyur Deus.
Nus honra kum Jose, ella sua maridu,
bossa Apostolu kum matrizadu
Pedro, Paulu, Andre,
James, Juang, Tomas, James Filip,
Bartholomew, Matthew, Simang,
kum Jude; nus honra Linus, Cletus,
Clement, Sixtus, Cornelius, Cyprian,
Lawrence, Chrysogonus, Juang,
kum Paulu, Cosmos kum Damian
assi kum tudu santu
Dessa olotru sua rezu alkansa per nus
bossa ajudasang kum dipendesang.
(Passadu di Kristu nussa Sinyur, Amen).
PER RESEBE OFERTA (Aceitai, Senhor)
Pai, resebe isti oferta di tudu bossa familia.
Bensua kum nus bossa paz na isti bida,
Salva kum nus di infernu;
Kontar kum nus juntadu kum keng bos ja skule
(Passadu di Kristu nussa Sinyur, Amen).
Benzei assi resebe nussa oferta
Juda resebe isti oferta na spritu kum berdadi
Dessa isti fika per nus
Sa korpu kum sangi di Jesus Kristu,
Bossa solteru Filu, nussa Sinyur
(Passadu di Kristu, nussa Sinyur, Amen).
REZU DI NUSSA SINYUR; KONSAGRASANG (Consagração)
Na dia anti di Eli sufri
Eli ja toma pang na Eli sa mang sagradu
Eli ja skuta per seu
Kum bos Eli sa Grandi Pai
Ja dar merse assi gabar kum bos
Eli ja kebra akeli pang
Ja dar ku Eli sa disiplu ja fala:
Toma isti, tudu bos, kumi:
Isto teng yeo sa korpu ki yeo logu dar per bos.
Kioraja kaba kumi,
Eli ja toma kopi
Di torna Eli ja dar merse assi gabar kum bos
Ja dar isti kopi kum Eli sa disiplu, ja fala:
Tomar isti kopi di yeo sa sangi
Sangi di ungwa uniang nubu ate per sempri
Isti sangi ki logu diskurre per bos assi per tudu jenti.
Per perdua pekadu
Faze isti na yeo sa lembransa
Beng nus publika sigredu di rilijiang.
(MEMORIAL DO MISTÉRIO E OFERTA)
Pai, nus selebra lembransa di Kristu bossa Filu
Nus bossa jenti juntadu kum bossa padri
Mazinar Eli sa sufrimintu, taming ki Eli ja bibe di torna
assi tudu ki nus ja alkansa di bos.
Nus oferse kum bos Deus di gloria kum majisteru
isti sagradu sakrifisu ki perfetu
sua pang di Bida
kum kopi di salvasang eternu.
Ola kum fabor na isti oferta
resebe isti, chuma bos ja resebe
oferta di bossa skrabu Abel,
sakrifisu di Abraham, nussa pai na rilijiang,
pang kum binyu ki Melchisedech bossa padri ja oferse.
Grandi Deus,
nus reza ki bossa anju logu toma isti sakrifisu
per bossa altar na seu
ja kaba nus resebe di isti altar
sa sagradu korpu kum sangi di bossa Filu,
dessa nus fika inchidu kum tudu grasa taming bensa
(Passadu di Kristu nussa Sinyur, Amen).
PER DEFUNTU (Comemoração dos Defuntos)
Sinyur, juda lembra kum tudu defuntu
ki ja bai anti di nus kum sinal di rilijiang
prinsipal per keng nus agora ta reza N kum N.
Dessa olotru kum tudu ki ta durmi kum Kristu
alkansa na bossa presensa,
lus, alegria kum paz
(Passadu di Kristu nussa Sinyur, Amen).
PER NUS PEKADOR (Por nós, pecadores)
Per nussa kinyang nus pidi umpoku parti
na uniang di bossa Apostolu kum matrizadu
kum Juang Baptista, Stephen, Matthias, Barnabas, assi tudu santu.
Maski nus pekador, mas nus konfia na bossa piadadi kum amurozu.
Nang konsidera ki nus miste alkansa, mas dar bossa perdang kum nus.
Passadu di Kristu, nussa Sinyur
Bos bensua tudu isti ankoza
Bos incher kum olotru tudu ki presizu
Bos benzei kum faze sagradu kum olotru. •
Na sequência da publicação de alguns textos em papiá kristang e em patois, RC imprime neste número a versão do Ordinário da Missa em papiá kristang - o dialecto de raiz portuguesa ainda falado pela comunidade portuguesa de Malaca. É nossa intenção deixar assim tombados, na forma escrita impressa, alguns documentos úteis ao conhecimento dos crioulos de origem portuguesa, e à sua investigação e estudo no futuro, quer no aspecto linguístico quer nas referências antropológicas que eles contêm, expressam ou denunciam. No que diz respeito ao presente documento, perfeitamente adaptado e actualizado segundo as reformas da Liturgia e do Ritual Católicos, escusamo-nos à publicação paralela do texto em português, quer pelo fácil cotejo com referências memorizadas pela generalidade dos leitores, quer pelo fácil acesso à versão em Língua portuguesa.
desde a p. 105
até a p.